ການຝຶກອົບຮົມການບັນຊີວິສາຫະກິດ ລະບົບປັບປຸ່ງ 2020

ສໍາເລັດຊຸດຝຶກອົບຮົມການບັນຊີ ລົງເລິກກິດຈະກໍາການຄ້າ ໃຫ້ແກ່ພະນັກງານບັນຊີ

​ໃນວັນທີ 2 ມິຖຸນາ 2023 ທີ່ຜ່ານມາ, ກົມຄຸ້ມຄອງການບັນຊີ ກະຊວງການເງິນ ຮ່ວມກັບ ສະພາວິຊາຊີບນັກບັນຊີ ແລະ ນັກກວດສອບລາວ (ສວ-ບກລ) ໄດ້ມີພິທີປິດຊຸດຝຶກອົບຮົມ ວຽກງານບັນຊີທ້າຍສະໄໝ ໃຫ້ແກ່ພະນັກງານບັນຊີຂອງ ຫົວໜ່ວຍທຸລະກິດ, ວິສາຫະກິດບັນຊີ-ກວດສອບ ແລະ ຄູ-ອາຈານ ຈາກສະຖາບັນການສຶກສາ. ໂດຍເປັນກຽດເຂົ້າຮ່ວມ ເປັນປະທານທ່ານ ນາງ ດາວອນ ທອງຈັນ ຫົວໜ້າກົມຄຸ້ມຄອງການບັນຊີ ກະຊວງການເງິນ, ໃຫ້ກຽດເປັນວິທະຍາກອນ ໂດຍ ທ່ານ ວັນໄຊ ທອງສີທາວົງ ຮອງຫົວໜ້າກົມຄຸ້ມຄອງການບັນຊີ ກະຊວງການເງິນ ແລະ ມີຄະນະພະແນກ, ພະນັກງານກົມຄຸ້ມຄອງການບັນຊີ, ພະນັກງານວິຊາການ ຂອງ ສວ-ບກລ, ພະນັກງານບັນຊີ ຂອງຫົວໜ່ວຍທຸລະກິດ ແລະ ວິສາຫະກິດບັນຊີ-ກວດສອບ ເຂົ້າຮ່ວມໃນ ພິທີປິດ ລວມທັງໝົດ ຈໍານວນ 113 ທ່ານເຂົ້າຮ່ວມ.

ການຝຶກດັ່ງກ່າວນີ້ແມ່ນໃຊ້ໄລຍະເວລາ 05 ວັນ  ຄື: ວັນທີ 29/05/2023 – 2/06/2023. ຊື່ງການຝຶກອົບຮົມນີ້ແມ່ນໄດ້ຈັດຂຶ້ນຢູ່ທີ່ ສະຖາບັນການເງິນ-ການບັນຊີ (ດົງຄຳຊ້າງ), ບັນດານັກສຳມະນາກອນ ທີ່ໄດ້ຮັບໃບຢັ້ງຢືນໃນຄັ້ງນີ້ ແມ່ນໄດ້ຜ່ານການຮັບຟັງການນໍາສະເໜີ, ພ້ອມກັນຄົ້ນຄວ້າການບັນຊີສຳລັບການຄ້າ, ໂດຍໄດ້ລົງເລິກກ່ຽວກັບການກຳນົດຜັງບັນຊີສະເພາະການຄ້າ, ບັນດາລາຍການເຄື່ອນໄຫວປະຈຳວັນ, ບັນດາລາຍການປັບປຸງທ້າຍສະໄໝ, ການສ້າງໃບລາຍງານສົມທຽບຜົນໄດ້ຮັບດ້ານບັນຊີ ແລະ ດ້ານອາກອນ, ການຄິດໄລ່ຕົວເລກເຂົ້າໃນໃບລາຍງານກະແສເງິນສົດ, ການສ້າງບົດອະທິບາຍຊ້ອນທ້າຍ ເອກະສານລາຍງານການເງິນ ແລະ ການນຳໃຊ້ໂປຣແກຣມບັນຊີ. ການຝຶກອົບຮົມ ໃນຄັ້ງນີ້ແມ່ນເພື່ອແນ່ໃສ່ຍົກລະດັບຄວາມຮູ້ ດ້ານວຽກງານການບັນຊີວິສາຫະກິດ ທີ່ໄດ້ປັບປຸງໃຫ້ແກ່ພະນັກງານບັນຊີ ຂອງຫົວໜ່ວຍທຸລະກິດ ແລະ ວິສາຫະກິດບັນຊີ-ກວດສອບ ເພື່ອນຳໄປຈັດຕັ້ງປະຕິບັດຕົວຈິງ ໃຫ້ມີຄວາມເປັນເອກະພາບກັນ ແລະ ເພື່ອຜັນຂະຫຍາຍ ໃນຂອບເຂດທົ່ວປະເທດ.

ໃນພິທີເປັນກຽດຂຶ້ນມອບໃບຢັ້ງຢືນ, ໂດຍທ່ານ ນາງ ດາວອນ ທອງຈັນ ເຊິ່ງມີຜູ້ຂື້ນຮັບໃບຢັ້ງຢືນ ຈຳນວນ 95 ທ່ານ ໃນນັ້ນ, ຈາກ ຄູ-ອາຈານ ສະຖາບັນການເງິນ-ການບັນຊີ ຈຳນວນ 10 ທ່ານ, ພະນັກງານບັນຊີ ຂອງຫົວໜ່ວຍທຸລະກິດ ຈໍານວນ 62 ທ່ານ ແລະ ພະນັກງານຈາກ ບໍລິສັດບັນຊີ-ກວດສອບ ຈໍານວນ 23 ທ່ານ. ພ້ອມນັ້ນ, ທ່ານຍັງໄດ້ມີຄໍາເຫັນໂອ້ລົມເພື່ອເປັນທິດເຍືອງທາງໃນການຈັດຕັ້ງປະຕິບັດວຽກງານໃນຕໍ່ໜ້າ ໂດຍໄດ້ເນັ້ນໃຫ້ນັກສໍາມະນາກອນທີ່ເຂົ້າຮ່ວມຝຶກອົບຮົມໃນຄັ້ງນີ້ ນໍາເອົາບົດຮຽນທີ່ໄດ້ຮ່ຳຮຽນໄປໃຊ້ເຂົ້າໃນຈັດຕັ້ງປະຕິບັດວຽກງານຂອງຕົນໃຫ້ເກີດຜົນ.