ສະພາວິຊາຊີບນັກບັນຊີ ແລະ ນັກກວດສອບຝຶກອົບຮົມໃນຫົວຂໍ້ “ການກວດສອບພາຍນອກ” External Audit

 ໂດຍອີງຕາມຂໍ້ຕົກລົງຂອງລັດຖະມົນຕີກະຊວງການເງິນ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງສະພາວິຊາຊີບນັກບັນຊີ ແລະ ນັກກວດສອບ ສະບັບເລກທີ 0994/ກງ, ລົງວັນທີ 07 ເມສາ 2022 ແລະ ອີງຕາມກົດລະບຽບຂອງສະພາວິຊາຊີບນັກບັນຊີ ແລະ ນັກກວດສອບ ສະບັບເລກທີ 038/ສວ-ບກລ, ລົງວັນທີ 20 ກຸມພາ 2024 ກ່ຽວກັບການຍົກລະດັບແບບຕໍ່ເນື່ອງ ແລະ ການເກັບຊົ່ວໂມງ (CPD) ຂອງສະມາຊິກ ສວ-ບກລ. 

ໃນວັນທີ 9 ມິຖຸນາ 2024 ນີ້, ທີ່ສະຖາບັນເສດຖະກິດການເງິນ-ການບັນຊີ (ສກຊ) ສະພາວິຊາຊີບນັກບັນຊີ ແລະ ນັກກວດສອບ ຫຼື ສວ-ບກລ, ໄດ້ຈັດຊຸດຝຶກອົບຮົມໃນຫົວຂໍ້ “ການກວດສອບພາຍນອກ” External Audit, ການວາງແຜນການກວດອບ ແລະ ການກວດສອບໃນແຕ່ລະອົງປະກອບຂອງເອກະສານລາຍງານການເງິນ (Audit Planning & Substantive Test), ໂດຍການເຂົ້າຮ່ວມ-ບັນຍາຍຂອງທ່ານ ສອນໄຊ ສີລາເພັດ ປະທານສະພາວິຊາຊີບນັກບັນຊີ ແລະ ນັກກວດສອບ, ມີຜູ້ຕາງໜ້າຈາກກົມຄຸ້ມຄອງການບັນຊີ, ສະຖາບັນເສດ ຖະກິດການເງິນ-ການບັນຊີ, ກົມປະຕິຮູບລັດວິສາຫະກິດ ແລະ ການປະກັນໄພ, ສະຖາບັນການທະນາຄານ ທີ່ເປັນ ຄູ່ຮ່ວມມື,ນັກວິທະຍາກອນ, ບັນດານັກສຳມະນາກອນຈາກສະມາຊິກສາມັນ ສວ-ບກລ, ສະມາຊິກສະໜັບສະໜູນ ສວ-ບກລ, ນັກຝຶກອົບຮົມ CPA, ບຸກຄົນທົ່ວໄປເຂົ້າຮ່ວມແບບເຊິ່ງໜ້າ ແລະ ອອນລາຍຫຼາຍກວ່າ 220 ທ່ານ.

ຊຸດຝຶກອົບຮົມດັ່ງກ່າວມີຄວາມໝາຍຄວາມສຳຄັນຍິ່ງຕໍ່ນັກຝຶກອົບຮົມທີ່ໄດ້ເຂົ້າຮ່ວມຝຶກອົບຮົມ ໃນການນຳເອົາຄວາມຮູ້ກວດສອບພາຍໃນແບບຕໍ່ເນື່ອງໄປນໍາໃຊ້ເຂົ້າໃນການກວດສອບພາຍໃນວຽກງານ, ນອກນີ້, ຍັງເປັນການເສີມຂະຫຍາຍການສ້າງ, ການວາງແຜນ, ການກວດສອບພາຍນອກ, ວິທີການກວດສອບໃນແຕ່ລະອົງປະ ກອບຂອງເອະສານລາຍງານການເງິນເຊັ່ນ: ຊັບສົມບັດຄົງທີ່ມີຕົວຕົນ, ໜີ້ຕ້ອງຮັບ, ເງິນສົດ, ເງິນຝາກທະນາຄານ, ໜີ້ຕ້ອງສົ່ງ, ລາຍຮັບ ແລະ ລາຍຈ່າຍບໍລິຫານ.