Grand opening new lcpaa office building

ໃນວັນທີ 06 ກໍລະກົດ 2024, ສະພາວິຊາຊີບນັກບັນຊີ ແລະ ນັກກວດສອບ (ສວ-ບກລ) ໄດ້ຈັດພິທີຂຶ້ນຫ້ອງການໃໝ່ຂອງສະພາວິຊາຊີບນັກບັນຊີ ແລະ ນັກກວດສອບ ທີ່ສະຖາບັນການເງິນ-ການບັນຊີ (ດົງຄໍາຊ້າງ), ໂດຍການໃຫ້ກຽດເຂົ້າຮ່ວມເປັນປະທານເປີດພິທີຂອງທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ, ມີຫົວໜ້າກົມຄຸ້ມຄອງການບັນຊີ, ຫົວໜ້າສະຖາບັນການເງິນ-ການບັນຊີ, ປະທານສະພາວິຊາຊີບນັກບັນຊີ   ແລະ ນັກກວດສອບ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີ, ທ່ານ ສອນໄຊ ສີລາເພັດ ປະທານສະພາວິຊາຊີບນັກບັນຊີ ແລະ ນັກກວດສອບ ໄດ້ລາຍງານໂດຍຫຍໍ້ ກ່ຽວກັບ ສວ-ບກລ ເຊິ່ງໄດ້ສ້າງຕັ້ງຂຶ້ນແຕ່ ປີ1998 ພາຍໃຕ້ຊື່ “ອົງການຈັດຕັ້ງວິຊາຊີບນັກບັນຊີ ແລະ ນັກກວດສອບ” (ຕາມຂໍ້ຕົກລົງຂອງລັດຖະມົນຕີກະຊວງການເງິນ ສະບັບເລກທີ 0722/ກງ ລົງວັນທີ 5 ພຶດສະພາ 1998), ຜ່ານການເຄື່ອນໄຫວມາຮອດ ປີ 2015 ຈຶ່ງໄດ້ປ່ຽນຊືີ່ເປັນ ສະພາວິຊາຊີບນັກບັນຊີ ແລະ ນັກກວດສອບ (ຕາມຂໍ້ຕົກລົງຂອງລັດຖະມົນຕີກະຊວງການເງິນ ສະບັບເລກທີ 1004/ກງ ລົງວັນທີ 07 ເມສາ 2015) ເພືີ່ອໃຫ້ສອດຄ່ອງກັບແນວທາງນະໂຍບາຍຂອງຂັ້ນເທິງ ກ່ຽວກັບວຽກງານຊຸກຍູ້ ແລະ ພັດທະນາວິຊາຊີບການບັນຊີລາວ ໃຫ້ເປັນທີີ່ຍອມຮັບຈາກສາກົນ. ສວ-ບກລ ໄດ້ເປັນສະມາຊິກຂອງ ສະຫະພັນນັກບັນຊີອາຊຽນ (AFA) ໃນປີ 2005 ຕາມພັນທະການຮ່ວມມືພັດທະນາວິຊາຊີບການບັນຊີ ແລະ ກວດສອບ ຂອງບັນດາປະເທດສະມາຊິກອາຊຽນ ແລະ ຍັງໄດ້ຮັບຮອງເປັນສະມາຊິກສົມທົບຂອງສະຫະພັນນັກບັນຊີສາກົນ (IFAC) ໃນປີ 2019 ຊິ່ງຖືເປັນບາດກ້າວສໍາຄັນ ທີີ່ເຮັດໃຫ້ ສວ-ບກລ ເປັນທີີ່ຮັບຮູ້ໃນລະດັບສາກົນ.

​ນອກຈາກນີ້, ຍັງໄດ້ພົວພັນຮ່ວມມືທາງດ້ານວິຊາການກັບອົງການຈັດຕັ້ງວິຊາຊີບການບັນຊີ ແລະ ກວດສອບ ໃນລະດັບສາກົນ ເຊັັ່ນ: ACCA ຈາກປະເທດອັງກິດ, CPA Australia ແລະ ອົງການຈັດຕັ້ງໃນປະເທດໃກ້ຄຽງເພືີ່ອຮ່ວມມືກັນ ໃນດ້ານການພັດທະນາວິຊາຊີບການບັນຊີ ແລະ ກວດສອບ ໃນ ສປປ ລາວ.

ໂອກາດນີ້, ທ່ານ ບຸນປອນ ວັນນະຈິດ ກ່າວວ່າ: ການນຳໃຊ້ຫ້ອງການໃໝ່ຫຼັງນີ້  ສະເເດງເຖິງການພັດທະນາ  ແລະ ການເຕີບໃຫຍ່ຂະຫຍາຍຕົວຂອງ ສວ-ບກລ. ຫ້ອງການດັ່ງກ່າວ ຈະເປັນສະຖານທີ່ປະຕິບັດໜ້າທີ່ຮັບຜິດຊອບຂອງພະນັກງານ ແລະ ຄະນະບໍລິຫານ ຂອງ ສວ-ບກລ ທີ່ກະຊວງການເງິນໄດ້ມອບໝາຍໃຫ້, ເຊິ່ງເປັນສະຖານທີ່ກໍ່ສ້າງນັກວິຊາຊີບທາງດ້ານບັນຊີ  ແລະ ກວດສອບ ຂອງ ສປປ ລາວ, ເປັນສະຖານທີ່ເຕົ້າໂຮມ ແລະ  ສຶກສາຮຽນຮູ້  ກ່ຽວກັບວຽກງານການບັນຊີ  ແລະ ກວດສອບ ຂອງສະມາຊິກ, ນັກສຶກສາ  ແລະ ພາກສ່ວນຕ່າງໆ.

ພາຍຫຼັງທີ່ໄດ້ນຳໃຊ້ຫ້ອງການດັ່ງກ່າວແລ້ວ ພະນັກງານ ແລະ ຄະນະບໍລິຫານຂອງ ສວ-ບກລ ຈະຕ້ອງເພີ່ມທະວີ ເອົາໃສ່ໃນການນຳໃຊ້ອາຄານດັ່ງກ່າວ ໃຫ້ມີປະສິດທິພາບ ແລະ ປະສິດທິຜົນສູງສູດ ພ້ອມທັງບູລະນະຮັກສາໃຫ້ຢູ່ໃນສະພາບທີ່ດີ ແລະ ມີຄວາມຍຶນຍົງ ເພື່ອພັດທະນາວີຊາຊີບການບັນຊີ ແລະ ການກວດສອບຂອງລາວ ໃຫ້ສາມາດທຽບເທົ່າກັບພາກພື້ນ ແລະ ສາກົນ.