LCPAA Runs new batch cpa-xviii

ສະພາວິຊາຊີບນັກບັນຊີ ແລະ ນັກກວດສອບ ປະຖົມນິເທດ ແລະ ເປີດຊຸດຝຶກອົບຮົມຫຼັກສູດ ວິຊາຊີບຊ່ຽວ ຊານບັນຊີ ຊຸດທີ 18 (CPA XVIII)

​ສະພາວິຊາຊີບນັກບັນຊີ ແລະ ນັກກວດສອບ (ສວ-ບກລ), ໄດ້ຈັດງານປະຖົມນິເທດ ແລະ ເປີດຊຸດຝຶກອົບຮົມຫຼັກສູດວິຊາຊີບຊ່ຽວຊານບັນຊີ ຊຸດທີ 18 (CPA XVIII) ຂຶ້ນໃນວັນທີ 5 ສິງຫາ 2023 ຜ່ານມານີ້, ທີ່ສະໂມສອນໃຫຍ່ຂອງສະຖາບັນການເງິນ-ການບັນຊີ (ສກຊ); ໂດຍການເຂົ້າຮ່ວມເປັນປະທານຂອງທ່ານ ນາງ ດາວອນ ທອງຈັນ ຫົວໜ້າກົມຄຸ້ມຄອງການບັນຊີ ກະຊວງການເງິນ ແລະ ທ່ານ ສອນໄຊ ສີລາເພັດ ປະທານສະພາວິຊາຊີບນັກບັນຊີ ແລະ ນັກກວດສອບ; ມີຮອງຫົວໜ້າສະຖາບັນການເງິນ-ການບັນຊີ, ຄະນະບໍລິຫານງານສະພາວິຊາຊີບນັກບັນຊີ ແລະ ນັກກວດສອບ, ຫົວໜ້າ-ຮອງຫົວໜ້າຂະແໜງ, ບັນດານັກຝຶກຮົບຮົມຊ່ຽວຊານນັກບັນຊີເຂົ້າຮ່ວມ.

​ໃນພິທີດັ່ງກ່າວ, ໄດ້ຮັບຟັງການນໍາສະເໜີສະພາບລວມຂອງສະພາວິຊາຊີບນັກບັນຊີ ແລະ ນັກກວດສອບ, ຫຼັກສູດວິີຊາຊີບຊ່ຽວຊານບັນຊີ CPA, ລະບຽບກ່ຽວກັບການຝຶກງານເປັນຊ່ຽວຊານນັກບັນຊີ,  ຜົນໄດ້ຮັບຫຼັກຈາກຈົບຫຼັກສູດ ແລະ ທາງເລືອກໃນການປະກອບອາຊີບ, ຈັນຍາບັນດ້ານວິຊາຊີບການບັນຊີ, ລະບຽບການຮຽນ-ການສອນ, ການສອບເສັງ, ນິຕິກຳກ່ຽວຂ້ອງກັບການປະກອບອາຊີບການບັນຊີ ແລະ ກວດສອບລວມທັງລະບຽບການທີ່ກ່ຽວຂ້ອງກັບການຝຶກອົບຮົມ, ເພື່ອເຮັດໃຫ້ບັນດານັກຝຶກອົບຮົມໄດ້ເຂົ້າໃຈລະບຽບການຕ່າງໆກ່ອນເລີ່ມຝຶກອົບຮົມຢ່າງເປັນທາງການໃນວັນທີ 12 ສິງຫາ 2023 ນີ້, ໂດຍຈະໃຊ້ໄລຍະເວລາທັງໝົດ 3 ປີ, ເຊິ່ງມີຜູ້ເຂົ້າຮ່ວມຝຶກອົບຮົມທັງໝົດ 382 ທ່ານ. ໃນນີ້, ມີພະນັກງານຈາກບັນດາບໍລິສັດເອກະຊົນ ຈໍານວນ 328 ທ່ານ, ພະນັກງານ-ລັດຖະກອນຂອງລັດ ຈໍານວນ 39 ທ່ານ, ສະຖາບັນການສຶກສາ ຈໍານວນ 11 ທ່ານ ແລະ ພະນັກງນຂອງສະພາວິຊາຊີບນັກບັນຊີ ແລະ ນັກກວດສອບ ຈໍານວນ 4 ທ່ານ.

ໂອກາດນີ້, ທ່ານ ນາງ ດາວອນ ທອງຈັນ ຫົວໜ້າກົມຄຸ້ມຄອງການບັນຊີ ກະຊວງການເງິນ ໄດ້ມີຄໍາເຫັນ
ພ້ອມທັງສະແດງຄວາມຊົມເຊີຍຕໍ່ຊຸດຝຶກອົບຮົມຫຼັກສູດວິຊາຊີບຊ່ຽວຊານບັນຊີ ຊຸດທີ 18 (CPA XVIII), ສໍາລັບສະພາວິຊາຊີບນັກບັນຊີ ແລະ ນັກກວດສອບ ແມ່ນການຈັດຕັ້ງໜຶ່ງຂຶ້ນກັບກະຊວງການເງິນ, ໂດຍມີບົດບາດໃນການສ້າງທີ່ປຶກສາການບັນຊີ ແລະ ເຕົ້າໂຮມສະມາຊິກຂອງຕົນ, ຕໍ່ມາໄດ້ປ່ຽນຊື່ເປັນສະພາວິຊາຊີບນັກບັນຊີ ແລະ ນັກກວດສອບເພື່ອໃຫ້ສອດຄ່ອງກັບກົດໝາຍວ່າດ້ວຍການບັນຊີ ປີ 2013 ແລະ ກົດໝາຍກວດສອບອິດສະຫຼະ ປີ 2014, ເຊິ່ງເປັນການປະກອບສ່ວນອັນສໍາຄັນໃນການພັດທະນາເສດຖະກິດ-ສັງຄົມ,ເປັນການຊຸກຍູ້ນໍາພາ, ເຕົ້າໂຮມສະມາຊິກລວມທັງປົກປ້ອງສິດທິຜົນປະໂຫຍດອັນຊອບທຳຂອງນັກບັນຊີ ແລະ ນັກກວດສອບໃຫ້ເຄື່ອນໄຫວຖືກ ຕ້ອງຕາມລະບຽບກົດໝາຍ, ທັງເປັນການຊ່ວຍຊູກຍູ້ບັນດາຫົວໜ່ວຍທຸລະກິດ,ວິສາຫະກິດທັງພາກລັດ ແລະ ເອກະຊົນຖືບັນຊີຢ່າງຖືກຕ້ອງຕາມລະບຽບກົດໝາຍ ແລະ ອື່ນໆ.

ສະນັ້ນ, ການເປີດຊຸດຝຶກອົບຮົມຫຼັກສູດວິຊາຊີບຊ່ຽວຊານນັກບັນຊີ ຊຸດທີ 18 (CPA XVIII) ເປັນການຍົກລະດັບວິຊາຊີບການບັນຊີໃຫ້ມີຄຸນນະພາບທີ່ເປັນໜ້າເຊື່ອຖື, ສ້າງຄວາມໜ້າເຊື່ອຖືດ້ານວິຊາຊີບດ້ວຍການຍົກສູງຄຸນຄ່າທາງຈັນຍາບັນ, ສ້າງນັກຊ່ຽວຊານບັນຊີລາວໃຫ້ເປັນທີ່ຮັບຮູ້ໃນອາຊຽນ ແລະ ສອດຄ່ອງກັບມາດຕະຖານສາກົນ.    ​