LSCO and lcpaa co-organize training on the GAP analysis between IFRS and LAS

ໃນລະຫວ່າງວັນທີ 26-27 ມິຖຸນາ 2025, ສໍານັກງານຄະນະກໍາມະການຄຸ້ມຄອງຫຼັກຊັບ (ສຄຄຊ) ຮ່ວມກັບສະພາວິຊາຊີບນັກບັນຊີ ແລະ ນັກກວດສອບ ໄດ້ຈັດຊຸດຝຶກອົບຮົມໄລຍະສັ້ນ ມາດຕະຖານສາກົນດ້ານການລາຍງານການເງິນຂຶ້ນ ໃນຫົວຂໍ້: "ການວິເຄາະຊ່ອງຫວ່າງມາດຕະຖານສາກົນ ກັບມາດຕະຖານລາວ ດ້ານການລາຍງານການເງິນ (GAP analysis between IFRS and LAS)" ໂດຍການເປັນປະທານຂອງ ທ່ານ ນ. ອາລຸນນາ ສີວົງທອງ ຮອງຫົວໜ້າສໍານັກງານຄະນະກໍາມະການຄຸ້ມຄອງຫຼັກຊັບ ແລະ ໄດ້ຮັບກຽດເຂົ້າຮ່ວມຈາກຮອງປະທານສະພາວິຊາຊີບນັກບັນຊີ ແລະ ນັກກວດສອບ, ກໍາມະການຄະນະບໍລິຫານງານສະພາວິຊາຊີບນັກບັນຊີ ແລະ ນັກກວດສອບ ແລະ ສໍາມະນາກອນຈາກຫຼາຍພາກສ່ວນເຂົ້າຮ່ວມ. ​

ຈຸດປະສົງໃນການຈັດຝຶກອົບຮົມໃນຄັ້ງນີ້ແມ່ນເພື່ອສ້າງຄວາມເຂັ້ມແຂງທາງດ້ານມາດຕະຖານສາກົນດ້ານການລາຍງານການເງິນ (IFRS) ແລະ ມາດຖານບັນຊີສາກົນ (LAS) ໃຫ້ແກ່ສໍາມະນາກອນຜູ້ເຂົ້າຮ່ວມຝຶກອົບຮົມໃຫ້ສາມາດຍົກສູງຄວາມຮູ້, ຄວາມເຂົ້າໃຈ ແລະ ສາມາດນໍາບົດຮຽນທີ່ໄດ້ຈາກການຝຶກອົບຮົມຄັ້ງນີ້ໄປໝູນໃຊ້ເຂົ້າໃນວຽກງານຕົວຈິງ ແລະ ດໍາເນີນການຫັນໄປສູ່ການຈັດຕັ້ງປະຕິບັດ IFRS ແບບເຕັມຮູບແບບ.

​ຊຸດຝຶກອົບຮົມຄັ້ງນີ້ດຳເນີນເປັນເວລາ 2 ວັນ. ນໍາໂດຍ ຄູຝຶກຜູ້ຊົງຄຸນວຸດທິ ທ່ານ ຄໍາປິວ ທິບພະວົງພັນ, ຮອງປະທານສະພາວິຊາຊີບນັກບັນຊີ ແລະ ນັກກວດສອບ ຊຶ່ງໃນຕອນທ້າຍຂອງການຈັດຝຶກອົບຮົມ ໄດ້ມີການແລກປ່ຽນສົນທະນາ ແລະ ໄດ້ມີການມອບ-ຮັບ ໃບຢັ້ງຢືນໃຫ້ແກ່ຜູ້ເຂົ້າຮ່ວມຝຶກອົບຮົມ.