ຝຶກອົບຮົມ “ວຽກງານກວດສອບ, ການຮັບປະກັນການວິເຄາະ ຄວາມສ່ຽງ ແລະ ການວິເຄາະຕໍາແໜ່ງຜະລິດ ຕະພັນ”

   ໃນລະຫວ່າງວັນທີ 21-22 ຕຸລາ 2023 ນີ້, ສະພາວິຊາຊີບນັກບັນຊີ ແລະ ນັກກວດສອບ (ສວ-ບກລ) ໄດ້ຈັດຝຶກອົບຮົມໃນຫົວຂໍ້“ວຽກງານກວດສອບ, ການຮັບປະກັນການວິເຄາະຄວາມສ່ຽງ ແລະ ການວິເຄາະຕໍາແໜ່ງຜະລິດຕະພັນ” ໂດຍການເປັນປະທານ ແລະ ບັນລະຍາຍຂອງທ່ານ ສອນໄຊ ສີລາເພັດ ປະທານສະພາວິຊາຊີບນັກບັນຊີແລະ ນັກກວດສອບ, ເຊິ່ງມີຜູ້ເຂົ້້າຮ່ວມຝຶກອົບຮົມທັງໝົດ 100 ທ່ານ, ຍິງ 57 ທ່ານ.ໃນນັ້ນ, ມີສະມາຊິກຂອງສະພາວິຊາຊີບນັກບັນຊີ ແລະ ນັກກວດສອບ, ຈາກຫຼັກສູດວິຊາຊີບຊ່ຽວຊານບັນຊີ (CPA), ຄະນະຮັບຜິດຊອບຈັດຊຸດຝຶກອົບຮົມ; ພາກສ່ວນທີ່ກ່ຽວຂ້ອງເຂົ້າຮ່ວມ.

    ໂດຍອີງຕາມຂໍ້ຕົກລົງຂອງລັດຖະມົນຕີກະຊວງການເງິນ ສະບັບເລກທີ 0994/ກງ, ລົງວັນທີ 07 ເມສາ 2022 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງສະພາວິຊາຊີບນັກບັນຊີ ແລະ ນັກກວດສອບ;  ອີງຕາມມາດຕາ 6 ຂອງກົດລະບຽບກ່ຽວກັບການຝຶກງານເປັນນັກຊ່ຽວຊານບັນຊີລາວ ວ່າດ້ວຍການຝຶກອົບຮົມສະໜັບສະໜູນດ້ານວິຊາຊີບ, ສະບັບເລກທີ 128/ສວ-ບກລ, ລົງວັນທີ 19 ສິງຫາ 2022; ສະພາວິຊາຊີບນັກບັນຊີ ແລະ ນັກກວດສອບໄດ້ຈັກຝຶກອົບຮົມຂຶ້ນເປັນເວລາ 02 ວັນທີ່ສະຖາບັນການທະນາຄານ, ພາຍໃຕ້ຫົວຂໍ້: “ວຽກງານກວດສອບ, ການຮັບປະກັນການວິເຄາະຄວາມສ່ຽງ ແລະ ການວິເຄາະຕໍາແໜ່ງຜະລິດຕະພັນ” ໃນຊຸດຝຶກອົບຮົມໃນຄັ້ງນີ້ໄດ້ລົງເລິກຫຼາຍຫົວຂໍ້ເຊັ່ນ: ພາບ ລວມວິທີການກວດສອບຂອງບໍລິສັດ,ການວາງແຜນ ແລະ ການປະເມີນຄວາມສ່ຽງ, ການປະເມີນການຄວບຄຸມພາຍໃນ, ການດຳເນີນການກວດສອບ, ການສະຫຼຸບ ແລະ ການລາຍງານ.

   ຈຸດປະສົງເພື່ອເປັນຍົກລະດັບຄວາມຮູ້ທາງດ້ານທິດສະດີ, ຄວາມສາມາດດ້ານວິຊາຊີບ, ໂດຍສະເພາະແມ່ນວຽກງານກວດສອບ, ການຮັບປະກັນ, ການວິເຄາະຄວາມສ່ຽງ ແລະ ການວິເຄາະຕໍ່າແໜ່ງຜະລິດພັນໃຫ້ກັບນັກຝຶກອົບຮົມຫຼັກສູດວິຊາຊີບຊ່ຽວຊານບັນຊີລາວ (CPA) ລຸ້ນທີ 12,13,14 ແລະ 15, ທັງເປັນການຕິດຕາມ ແລະ ເກັບກໍາຊົ່ວໂມງຝຶກອົບຮົມຂອງນັກຊ່ຽວຊານບັນຊີແບບລະບົບຕໍ່ເນື່ອງ (CPD) ໃຫ້ກັບສະມາຊິກສະພາວິຊາຊີບນັກບັນຊີ ແລະ ນັກກວດສອບ.

  ຕະຫຼອດໄລຍະການຝຶກອົບຮົມເຫັນໄດ້ວ່າບັນດານັກຝຶກອົບຮົມໃຫ້ຄວາມສົນໃຈ, ມີຄວາມເຂົ້້າໃຈກ່ຽວກັບວຽກງານກວດສອບ, ຄວາມເຂົ້າໃຈກ່ຽວກັບພາບລວມວີທີການກວດສອບຂອງບໍລິສັດ, ການວາງແຜນ ແລະ ການປະເມີນຄວາມສ່ຽງ, ການປະເມີນການຄວບຄຸມພາຍໃນ, ການກວດສອບການດຳເນີນການກວດສອບ, ການສະຫຼຸບ ແລະ ການລາຍງານຕ່າງໆ. ສ່ວນທິດທາງຕໍ່ໜ້າຈະສືບຕໍ່ຈັດຝຶກອົບຮົມກ່ຽວກັບວຽກງານກວດສອບ ໃຫ້ນັກຝຶກອົບຮົມຫຼັກສູດວິຊາຊີບຊ່ຽວຊານບັນຊີລາວ (CPA) ທີ່ຍັງບໍ່ທັນເຂົ້າຮ່ວມ ແລະ ໃນຕອນທ້າຍພິທີໄດ້ມີການມອບ-ຮັບໃບຢັ້ງຢືນໃຫ້ແກ່ນັກຝຶກອົບຮົມດັ່ງ ກ່າວໂດຍການມອບຂອງທ່ານ ສອນໄຊ ສີລາເພັດ ປະທານສະພາວິຊາຊີບນັກບັນຊີ ແລະ ນັກກວດສອບ.