opening new bacth of cpa-xix

ສະພາວິຊາຊີບນັກບັນຊີ ແລະ ນັກກວດສອບ ຈັດປະຖົມນິເທດການຝຶກອົບຮົມນັກວິຊາຊີບຊ່ຽວຊານບັນຊີລາວ ຊຸດທີ 19 (CPA-XIX)

ໃນວັນທີ 12 ຕຸລາ 2024 ທີ່ສະຖາບັນການເງິນ-ການບັນຊີ (ດົງຄຳຊ້າງ) ສະພາວິຊາຊີບນັກບັນຊີ ແລະ ນັກກວດສອບ (ສວ-ບກລ), ໄດ້ຈັດພິທີປະຖົມນິເທດ ແລະ ເປີດຊຸດຝຶກອົບຮົມຫຼັກສູດວິຊາຊີບຊ່ຽວຊານບັນຊີ ຊຸດທີ 19 (CPA XIX) ຂື້ນໂດຍການເປັນປະທານຮ່ວມຂອງທ່ານ ນາງ ດາວອນ ທອງຈັນ ຫົວໜ້າກົມຄຸ້ມຄອງການບັນຊີ ກະຊວງການເງິນ ແລະ ທ່ານ ສອນໄຊ ສີລາເພັດ ປະທານສະພາວິຊາຊີບນັກບັນຊີ ແລະ ນັກກວດສອບ; ມີທ່ານ ຟອງສີສຸພັນ ພົມມະວົງ ຫົວໜ້າສະຖາບັນການເງິນ-ການບັນຊີ, ທ່ານ ວັນໄຊ ທອງສີທາວົງ ຮອງຫົວໜ້າກົມຄຸ້ມຄອງການບັນຊີ, ທ່ານ ພອນສະຫວັນ ຄຳພາວົງ ຮອງອຳນວຍການ ສະຖາບັນການທະນາຄານ, ທ່ານ ຮ.ສ, ປ.ອ ໄຊສົມພອນ ກອງມະນີລາ ຮອງຄະນະບໍດີ ຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດ, ຄະນະບໍລິຫານງານ ແລະ ຄະນະກຳມະການສຶກສາຂອງ ສະພາວິຊາຊີບນັກບັນຊີ ແລະ ນັກກວດສອບ, ຫົວໜ້າ-ຮອງຫົວໜ້າຂະແໜງ, ບັນດາທ່ານແຂກຜູ້ມີກຽດທີ່ຖຶກເຊີນ ແລະ ບັນດານັກຝຶກຮົບຮົມຊ່ຽວຊານບັນຊີເຂົ້າຮ່ວມ.

ຈຸດປະສົງຂອງການປະຖົມນິເທດ ເປີດຊຸດຝຶກອົບຮົມວິຊາຊີບຊ່ຽວຊານບັນຊີ ຊຸດທີ 19 ນີ້ ມີຜູ້ເຂົ້າຮ່ວມແບບເຊິ່ງໜ້າຈຳນວນ 160 ກວ່າ ທ່ານ ແລະ ເຂົ້າຮ່ວມຮັບຟັງທາງອອນລາຍ ຈຳນວນ 220 ກວ່າທ່ານ. ໃນນີ້, ມີພະນັກງານຈາກບັນດາບໍລິສັດເອກະຊົນ ຈໍານວນ 344 ທ່ານ, ພະນັກງານ-ລັດຖະກອນຂອງລັດ ຈໍານວນ 39 ທ່ານ, ໂດຍໄດ້ມີການນໍາສະເໜີ ແລະ ອະທິບາຍໂດຍຫຍໍ້ກ່ຽວກັບ ສະພາບລວມຂອງສະພາວິຊາຊີບນັກບັນຊີ ແລະ ນັກກວດສອບ, ຫຼັກສູດວິີຊາຊີບຊ່ຽວຊານບັນຊີ CPA, ລະບຽບການຝຶກງານເປັນຊ່ຽວຊານນັກບັນຊີ,  ຜົນໄດ້ຮັບຫຼັງຈາກຈົບຫຼັກສູດວິຊາຊີບຊ່ຽວຊານບັນຊີ ແລະ ທາງເລືອກໃນການປະກອບອາຊີບ, ກົດຈັນຍາບັນດ້ານວິຊາຊີບການບັນຊີ, ລະບຽບການຮຽນ-ການສອນ ແລະ ການສອບເສັງ, ນິຕິກຳກ່ຽວຂ້ອງກັບການປະກອບອາຊີບການບັນຊີ ແລະ ກວດສອບ ລວມທັງລະບຽບການ-ການຝຶກອົບຮົມ, ປະຫວັດ ແລະ ປະສົບການຂອງອາຈານສອນແຕ່ລະທ່ານ. ເພື່ອເຮັດໃຫ້ບັນດານັກຝຶກອົບຮົມໄດ້ຮັບຮູ້ ແລະ ເຂົ້າໃຈກ່ຽວກັບລະບຽບການຕ່າງໆກ່ອນເລີ່ມຝຶກອົບຮົມຢ່າງເປັນທາງການ, ຫຼັກສູດວິຊາຊີບຊ່ຽວບັນຊີລາວ ແມ່ນຈະໃຊ້ໄລຍະເວລາທັງໝົດໂດຍປະມານ 3-4 ປີ ຈຶ່ງຈົບຫຼັກສູດ.

ໂອກາດນີ້, ທ່ານນາງ ດາວອນ ທອງຈັນ ໄດ້ສະແດງຄວາມຊົມເຊີຍຕໍ່ຊຸດຝຶກອົບຮົມຫຼັກສູດວິຊາຊີບຊ່ຽວຊານບັນຊີ ຊຸດທີ 19 (CPA XIX), ແລະ ໄດ້ເນັ້ນໜັກໃຫ້ບັນດານັກຝຶກອົບຮົມໄດ້ຮັບຮູ້ ເຂົ້າໃຈຄວາມໝາຍ ຄວາມສຳຄັນຂອງຈັນຍາບັນການປະກອບອາຊີບນັກບັນຊີ ແລະ ການຍົກລະດັບຄວາມຮູ້ຄວາມສາມາດດ້ານການບັນຊີ-ກວດສອບ ໃຫ້ທຽບເທົ່າກັບພາກພື້ນ ແລະ ສາກົນ ເພື່ອປະກອບສ່ວນເຂົ້າໃນການພັດທະນາເສດຖະກິດ ແລະ ສັງຄົມ, ສະພາວິຊາຊີບນັກບັນຊີ ແລະ ນັກກວດສອບ ແມ່ນການຈັດຕັ້ງໜຶ່ງທີ່ຂຶ້ນກັບກະຊວງການເງິນ, ແລະ ໄດ້ກຳນົດການເຄື່ອນໄຫວເຂົ້າໃນກົດໝາຍວ່າດ້ວຍການບັນຊີ ແລະ ກົດໝາຍວ່າດ້ວຍການກວດສອບ ອິດສະລະ, ໂດຍມີບົດບາດໃນການສ້າງທີ່ປຶກສາການບັນຊີ ແລະ ເຕົ້າໂຮມສະມາຊິກຂອງຕົນ, ເຊິ່ງເປັນການປະກອບສ່ວນອັນສໍາຄັນໃນການພັດທະນາເສດຖະກິດ-ສັງຄົມ,ເປັນການຊຸກຍູ້ນໍາພາ, ເຕົ້າໂຮມສະມາຊິກລວມທັງປົກປ້ອງສິດທິຜົນປະໂຫຍດອັນຊອບທຳຂອງນັກບັນຊີ ແລະ ນັກກວດສອບໃຫ້ເຄື່ອນໄຫວຖືກ ຕ້ອງຕາມລະບຽບກົດໝາຍ, ທັງເປັນການຊ່ວຍຊູກຍູ້ບັນດາຫົວໜ່ວຍທຸລະກິດ,ວິສາຫະກິດທັງພາກລັດ ແລະ ເອກະຊົນຖືບັນຊີຢ່າງຖືກຕ້ອງຕາມລະບຽບກົດໝາຍ ແລະ ອື່ນໆ.