taxris training

ຝຶກອົບຮົມ ຫົວຂໍ້: “ແນະນຳ ການນໍາໃຊ້ລະບົບ ມອບພັນທະສ່ວຍສາອາກອນ (TAXRIS) ແລະ ເຜີຍແຜ່ນິຕິກໍາສ່ວຍສາອາກອນ

​ໃນວັນທີ 06 ມີນາ 2026, ສະພາວິຊາຊີບ ນັກບັນຊີ ແລະ ນັກກວດສອບ ຮ່ວມກັບ ກົມສ່ວຍສາອາກອນ ກະຊວງການເງິນ, ໄດ້ຈັດຊຸດຝຶກອົບຮົມຮ່ວມກັນຂຶ້ນ ໃນຫົວຂໍ້: “ແນະນຳ ການນໍາໃຊ້ລະບົບ ມອບພັນທະສ່ວຍສາອາກອນ (TAXRIS) ແລະ ເຜີຍແຜ່ນິຕິກຳ ສ່ວຍສາອາກອນ”, ບັນຍາຍໂດຍ: ທ່ານ ນາງ ຄຳແຫວນ ຈິນດາວົງ, ຄະນະບໍລິຫານງານ ສະພາວິຊາຊີບນັກບັນຊີ ແລະ ນັກກວດສອບ (ສວ-ບກລ) ແລະ ຕາງໜ້າຈາກກົມສ່ວຍສາອາກອນ ກະຊວງການເງິນ ມີທ່ານ ວາເຊັ່ງ ເຮີ ຮອງຫົວຫນ້າພະແນກບໍລິການ ແລະ ທ່ານ ນາງ ໄພປານີ ຈູມມະລີ ຮັກສາການຫົວຫນ້າພະແນກ ອາກອນມູນຄ່າເພີ່ມ, ພ້ອມດ້ວຍຄະນະຮັບຜິດຊອບ ແລະ ນັກສຳມະນາກອນເຂົ້າຮ່ວມ.

ການຝືກອົບຮົມໃນຄັ້ງນີ້ແມ່ນໄດ້ຈັດຂຶ້ນເປັນເວລາ ເຄິ່ງວັນ ແລະ ຈັດຝຶກອົບຮົມເປັນ 2 ລະບົບ ຄື: ແບບລະບົບເຂົ້າຮ່ວມເຊິ່ງໜ້າ ແລະ ເຂົ້າອອນລາຍ ຜ່ານ Google meet ເຊິ່ງກ່ອນການດໍາເນີນ ຝຶກອົບຮົມ ກໍໄດ້ຮັບກຽດຈາກ ທ່ານ ສອນໄຊ ສີລາເພັດ ປະທານ ສວ-ບກລ ໃຫ້ກຽດ ເປັນປະທານກ່າວເປີດ ພິທີ.

​ຈຸດປະສົງຂອງການຈັດຝຶກອົບຮົມ, ເພື່ອເປັນການຍົກລະດັບຄວາມຮູ້, ຄວາມສາມາດທາງດ້ານການນໍາໃຊ້ລະບົບ ມອບພັນທະສ່ວຍສາອາກອນ (TAXRIS) ແລະ ເພື່ອເປັນການສ້າງຂີດຄວາມສາມາດແບບຕໍ່ເນື່ອງ ໃຫ້ກັບນັກບັນຊີ ທີ່ຕິດພັນກັບຫົວໜ່ວຍທຸລະກິດຕ່າງໆ ທີ່ມີໜ້າທີ່ ແລະ ມີພາລະບົດບາດ ໃນການນໍາໃຊ້ລະບົບດັ່ງກ່າວ ແກ່ວິສາຫະກິດ.

​ສຳລັບເນື້ອໃນ ແລະ ຫົວຂໍ້ໃນການຝຶກອົບຮົມ ແມ່ນລົກເລິກທັງໃນພາກທິດສະດີ ແລະ ການປະຕິບັດຕົວຈິງ ດ້ວຍການນຳພາເຂົ້ານຳໃຊ້ລະບົບ ໂດຍເນື້ອໃນແມ່ນລົງເລິກກ່ຽວກັບ: ແນະນໍາພາບລວມການນໍາໃຊ້ລະບົບຄຸ້ມຄອງການເກັບລາຍຮັບສ່ວຍສາອາກອນ (TAXRIS); ແນະນໍາການບໍລິການແຈ້ງອາກອນປະເພດຕ່າງໆ ໃນລະບົບ(TAXRIS); ແນະນໍາ ການແຈ້ງແບບຟອມ ອມພ ແລະ ນິຕິກໍາທີ່ກຽວຂ້ອງ.

ຜູ້ເຂົ້າຮ່ວມຝຶກອົບຮົມຄັ້ງນີ້ ມີທັງໝົດ 255 ທ່ານ, ໂດຍເຂົ້າຮ່ວມຝຶກອົບຮົມແບບເຊິ່ງໜ້າ 75 ທ່ານ ແລະ ເຂົ້າຮ່ວມທາງອອນລາຍ 180 ທ່ານ ທີ່ມາຈາກຫຼາຍພາກສ່ວນ ເຊັ່ນ: ເຂົ້າຮ່ວມໃນນາມພະນັກງານວິຊາການ ທີ່ເປັນແຂກຖືກເຊີນຂອງ ສວ-ບກລ 25 ທ່ານ, ສະມາຊິກ ບຸກຄົນ ຂອງ ສວ-ບກລ 98 ທ່ານ, ນັກຝຶກອົບຮົມ CPA 51 ທ່ານ ແລະ ບຸກຄົນທົ່ວໄປທີ່ເຂົ້າຮ່ວມນຳ 81 ທ່ານ.

​ໃນຕອນທ້າຍຂອງການຝຶກອົບຮົມ, ທ່ານ ສີປະພັນ ຄັນທະວົງສາ, ຫົວໜ້າຫ້ອງການ ສວ-ບກລ ໄດ້ກ່າວປິດຊຸດຝຶກອົບຮົມຢ່າງເປັນທາງການ ແລະ ໃຫ້ກຽດມອບໃບຢັ້ງຢືນ ໃຫ້ແກ່ຜູ້ເຂົ້າຮ່ວມຊຸດຝຶກອົບຮົມ ໂດຍ ທ່ານ ນາງ ຄຳແຫວນ ຈິນດາວົງ ຄະນະບໍລິຫານງານ ສວ-ບກລ.