Training on Preparation of the Statement of Cash Flows for Non-Public Interest Entities

ສະພາວິຊາຊີບນັກບັນຊີ ແລະ ນັກກວດສອບ (ສວ-ບກລ) ຈັດຝຶກອົບຮົມ ການສ້າງໃບລາຍງານ ກະແສເງິນສົດ ສຳລັບ ວິສາຫະກິດ ຂະໜາດໃຫຍ່ ທີ່ບໍ່ຕິດພັນກັບຜົນປະໂຫຍດ ສາທາລະນະ

​ໃນວັນທີ 21/02/2026 ທີ່ຫ້ອງຝຶກອົບຮົມຂອງສະພາວິຊາຊີບ ນັກບັນຊີ ແລະ ນັກກວດສອບ ໄດ້ມີການຈັດຝຶກອົບຮົມຂຶ້ນພາຍໃຕ້ຫົວຂໍ້ ການສ້າງໃບລາຍງານ ກະແສເງິນສົດ ສຳລັບ ວິສາຫະກິດ ຂະໜາດໃຫຍ່ ທີ່ບໍ່ຕິດພັນກັບຜົນປະໂຫຍດ ສາທາລະນະ (Preparation of the Statement of Cash Flows for Non-Public Interest Entities). ການຝຶກອົບຮົມດັ່ງກ່າວ ແມ່ນໄດ້ຮັບກຽດບັນລະຍາຍໂດຍ: ທ່ານ ວັນໄຊ ທອງສີທາວົງ. ຮອງຜູ້ອຳນວຍການທະນາຄານຄໍາ ລາວ ຈໍາກັດ, ອະດີດຮອງຫົວໜ້າກົມຄຸ້ມຄອງການບັນຊີ, ກະຊວງການເງິນ, ຜູ້ຂຽນປຶ້ມຄູ່ມືແບບຮຽນການບັນຊີວິສາຫະກິດສໍາລັບວິສາຫະກິດ ທີ່ບໍ່ຕິດພັນກັບຜົນປະໂຫຍດສາທາລະນະ. 

ພິທີຝຶກອົບຮົມດັ່ງກ່າວ ໄດ້ໃຫ້ກຽດກ່າວເປີດພິທີໂດຍ ທ່ານ ສອນໄຊ ສີລາເພັດ, ປະທານ ສະພາວິຊາຊີບນັກບັນຊີ ແລະ ນັກກວດສອບ (ສວ-ບກລ). ເຊິ່ງການຝຶກອົບຮົມໃນຄັ້ງນີ້ ແມ່ນໄດ້ດຳເນີນເປັນເວລາ 1 ວັນ ເຕັມ, ໂດຍຈັດຂຶ້ນໃນຮູບແບບປະສົມປະສານ ທັງການເຂົ້າຮ່ວມແບບເຊິງໜ້າ (Onsite) ແລະ ຜ່ານລະບົບທາງໄກ (Online) ດ້ວຍລະບົບ Google Meet
ຈຸດປະສົງຂອງການຈັດຝຶກອົບຮົມ ກໍ່ເພື່ອເສີມສ້າງຄວາມຮູ້ທາງດ້ານການສ້າງໃບລາຍງານກະແສເງິນສົດສຳລັບວິສາຫະກິດ  ຂະໜາດໃຫຍ່ ທີ່ບໍ່ຕິດພັນກັບຜົນປະໂຫຍດ ສາທາລະນະ ແລະ ເພື່ອເປັນການສ້າງຂີດຄວາມສາມາດແບບຕໍ່ເນື່ອງ ໃຫ້ກັບນັກບັນຊີ ທີ່ຕິດພັນກັບຫົວໜ່ວຍທຸລະກິດຕ່າງໆ ທີ່ມີໜ້າທີ່ ແລະ ມີພາລະບົດບາດ ໃນການສ້າງໃບລາຍງານກະແສເງິນສົດສຳລັບວິສາຫະກິດ.

​ເນື້ອໃນການຝຶກອົບຮົມ ແມ່ນລົກເລິກທັງໃນພາກທິດສະດີທີ່ເປັນການສ້າງໃບລາຍງານກະແສເງິນສົດສຳລັບວິສາຫະກິດ ແລະ ກໍ່ໄດ້ມີການນຳພານັກຝຶກອົບຮົມ ປະຕິບັດຕົວຈິງ ດ້ວຍການແກ້ໂຈດທີ່ໄດ້ສົມມຸດເປັນຕົວຢ່າງ ແລະ ແກ້ໂຈດດ້ວຍການນຳໃຊ້ Microsoft Excel ໂດຍເນື້ອໃນແມ່ນລົງເລິກກ່ຽວກັບ:

• ຮູບແບບ Cash Flows ແລະ ການກໍານົດຜັງບັນຊີ;
• ການ​ກະກຽມ ເອກະສານ ກ່ອນການຄິດໄລ່ຕົວເລກເຂົ້າໃນ Cash Flows;
• ວິທີການຄິດໄລ່ຕົວເລກເຂົ້າ ແຕ່ລະລາຍການ ໃນ Cash Flows;
• ການຈັດຕົວເລກຈໍານວນເງິນເຂົ້າ ໃນ Cash Flows.

​ການຝຶກອົບຮົມຄັ້ງນີ້ ໄດ້ມີຜູ້ເຂົ້້າຮ່ວມຝຶກອົບຮົມທັງໝົດມີ  108 ທ່ານ ໂດຍ ເຂົ້າຮ່ວມຝຶກອົບຮົມແບບເຊິ່ງໜ້າ 48 ທ່ານ ແລະ ເຂົ້າຮ່ວມທາງອອນລາຍ 60 ທ່ານ ທີ່ມາຈາກຫຼາຍພາກສ່ວນ ເຊັ່ນ:  ເຂົ້າຮ່ວມໃນນາມພະນັກງານວິຊາການ ທີ່ເປັນແຂກຖືກເຊີນ ຂອງ ສວ-ບກລ 17 ທ່ານ,  ມີສະມາຊິກ ບຸກຄົນ ຂອງ ສວ-ບກລ 62 ທ່ານ, ນັກຝຶກອົບຮົມ CPA 22 ທ່ານ  ແລະ ບຸກຄົນທົ່ວໄປທີ່ເຂົ້າຮ່ວມນຳ 7 ທ່ານ. ແລະ ຕອນທ້າຍຂອງວັນດຽວກັນ ກໍ່ໄດ້ມີການປິດຝຶກອົບຮົມ ໂດຍມີ ທ່ານ ສີປະພັນ ຄັນທະວົງສາ ຫົວໜ້າຫ້ອງການ ສວ-ບກລ ເປັນຜູ້ຕາງໜ້າ ມອບໃບຢັ້ງຢືນໃຫ້ແກ່ນັກຝຶກອົບຮົມ.