June 20th, 2023

ຝຶກອົບຮົມ ການບັນຊີວຽກງານທ້າຍສະໄໝ ລົງເລິກກິດຈະກຳການກໍ່ສ້າງ

​ໃນທ້າຍອາທິດ ທີ່ຜ່ານມາ ກົມຄຸ້ມຄອງການບັນຊີ ກະຊວງການເງິນ ຮ່ວມກັບ ສວ-ບກລ ໄດ້ມີຈັດພິທີປິດຊຸດຝຶກອົບຮົມ ວຽກງານບັນຊີທ້າຍສະໄໝ ໃຫ້ແກ່ ຄູ-ອາຈານ, ພະນັກງານບັນຊີ ຂອງຫົວໜ່ວຍທຸລະກິດ ແລະ ວິສາຫະກິດບັນຊີ-ກວດສອບ. ໂດຍການໃຫ້ກຽດເຂົ້າຮ່ວມ ເປັນປະທານຂອງ ທ່ານ ວັນໄຊ ທອງສີທາວົງ ຮອງຫົວໜ້າກົມຄຸ້ມຄອງການບັນຊີ ກະຊວງການເງິນ, ໃຫ້ກຽດເປັນ ວິທະຍາກອນ ໂດຍ ຈາກວິຊາການ ຂອງກົມຄຸ້ມຄອງການບັນຊີ ແລະ ມີຮອງຫົວໜ້າສະຖາບັນການເງິນ-ການບັນຊີ, ຄະນະພະແນກ, ພະນັກງານກົມຄຸ້ມຄອງການບັນຊີ, ຫົວໜ້າຫ້ອງການ, ພະນັກງານວິຊາການ ຂອງ ສວ-ບກລ, ພະນັກງານບັນຊີ ຂອງຫົວໜ່ວຍທຸລະກິດ ແລະ ວິສາຫະກິດບັນຊີ-ກວດສອບ ຈໍານວນ 83 ທ່ານ ເຂົ້າຮ່ວມ.

​ຊຸດຝຶກອົບຮົມ ໃນຄັ້ງນີ້ ດໍາເນີນມາເປັນເວລາ 5 ວັນຄື ເລີ່ມແຕ່ວັນທີ 12 ຫາ ວັນທີ 16 ມິຖຸນາ 2023 ບັນດານັກສຳມະນາກອນ ໄດ້ຮັບຟັງການນຳສະເໜີ, ພ້ອມກັນຄົ້ນຄວ້າ ການບັນຊີສຳລັບ ສັນຍາກໍ່ສ້າງ. ໂດຍໄດ້ລົງເລິກ ກ່ຽວກັບ ການກຳນົດຜັງບັນຊີສະເພາະ (ອີງຕາມໂຈດທີ່ຕັ້ງຂຶ້ນ), ບັນດາລາຍການເຄື່ອນໄຫວປະຈຳວັນ, ບັນດາລາຍການປັບປຸງທ້າຍສະໄໝ, ການສ້າງໃບລາຍງານສົມທຽບຜົນໄດ້ຮັບດ້ານບັນຊີ ແລະ ດ້ານອາກອນ, ການຄິດໄລ່ ຕົວເລກເຂົ້າໃນ ໃບລາຍງານກະແສເງິນສົດ, ການສ້າງບົດອະທິບາຍຊ້ອນທ້າຍ ເອກະສານລາຍງານການເງິນ ແລະ ການນຳໃຊ້ໂປຣແກຣມບັນຊີ.

ພາຍຫຼັງສໍາເລັດການຝຶກອົບຮົມ ກໍ່ໄດ້ມີການມອບໃບຢັ້ງຢືນ ໃຫ້ບັນດານັກສຳມະນາກອນ ທີ່ເຂົ້າຮ່ວມຝຶກອົບຮົມໃນຄັ້ງນີ້ ຈໍານວນ 76 ທ່ານ, ຍິງ 43 ທ່ານ. ໃນນັ້ນ, ຄູ-ອາຈານ ຈຳນວນ 11 ທ່ານ, ຈາກພະນັກງານບັນຊີ ຂອງຫົວໜ່ວຍທຸລະກິດທົ່ວໄປ ຈຳນວນ 39 ທ່ານ ແລະ ພະນັກງານຈາກ ບໍລິສັດບັນຊີ-ກວດສອບ ຈຳນວນ 26 ທ່ານ. ໂດຍການເປັນກຽດຂຶ້ນມອບໃບຢັ້ງຢືນ, ຂອງທ່ານ ວັນໄຊ ທອງສີທາວົງ ຮອງຫົວໜ້າກົມຄຸ້ມຄອງການບັນຊີ ກະຊວງການເງິນ.

ໂອກາດດັ່ງກ່າວ, ທ່ານ ວັນໄຊ ທອງສີທາວົງ ຍັງໄດ້ມີຄໍາເຫັນຕໍ່ກອງປະຊຸມ ແລະ ເນັ້ນໃຫ້ພະນັກງານບັນຊີ ຂອງຫົວໜ່ວຍຖືບັນຊີ ຕ້ອງຈັດວາງລະບົບບັນຊີ ໃຫ້ຫົວໜ່ວຍຖືບັນຊີ ທີ່ຕົນຮັບຜິດຊອບ ເພື່ອໃຫ້ແທດເໝາະ ກັບ ລະບົບບັນຊີ ທີ່ທາງລັດຖະມົນຕີກະຊວງການເງິນ ຮັບຮອງແລ້ວ ແລະ ໃຫ້ແທດເໝາະກັບ ກິດຈະກຳການເຄື່ອນໄຫວຕົວຈິງ ຂອງຫົວໜ່ວຍຖືບັນຊີ; ມີການແລກ­ປ່ຽນບົດ­ຮຽນ ແລະ ຊ່ວຍ­ເຫຼືອເຊິ່ງກັນ ແລະ ກັນ ຢ່າງເປັນປົກ­ກະ­ຕິ ແລະ ຕໍ່ເນື່ອງ ທາງດ້ານວິ­ຊາການ ລະ­ຫວ່າງ ກົມຄຸ້ມຄອງການບັນ­ຊີ, ສວ–ບກລ, ຄູ–ອາຈານ ສອນບັນຊີ, ພະນັກງານບັນຊີ ຂອງຫົວໜ່ວຍຖືບັນຊີ ແລະ ບໍລິສັດບໍລິການບັນຊີ ແລະ ກວດສອບ ເພື່ອຍົກລະ­ດັບ ດ້ານວຽກງານການບັນຊີ ແລະ ກວດສອບ ໃຫ້ນັບມື້ນັບດີຂຶ້ນ, ມີຄວາມເປັນເອ­ກະພາບກັນ ແລະ ມີຄຸນນະພາບ ດີຂຶ້ນເທື່ອລະກ້າວ.