LCPAA-ACCA_IFRS-training (August 2-4, 2023)

ມອບ-ຮັບ ໃບຢັ້ງຢືນໃຫ້ຜູ້ສຳເລັດການຝຶກອົບຮົມ ຄວາມຮູ້ກ່ຽວກັບມາດຕະຖານລາຍງານການເງິນສາກົນ IFRS

​ວັນທີ 4 ສິງຫາ 2023 ຜ່ານມານີ້, ທີ່ສະຖາບັນການທະນາຄານ, ໄດ້ຈັດພິທີປິດຊຸດຝຶກອົບຮົມ ແລະມອບ-ຮັບໃບຢັ້ງຢືນໃຫ້ຜູ້ສຳເລັດຊຸດຝຶກອົບຮົມພາຍໃຕ້ຫົວຂໍ້:ຄວາມຮູ້ກ່ຽວກັບມາດຕະຖານລາຍງານການເງິນສາກົນ (IFRS), ໂດຍການເປັນກຽດເຂົ້າຮ່ວມ-ມອບໃບຢັ້ງຢືນຂອງທ່ານ ສອນໄຊ ສີລາເພັດ ປະທານສະພາວິຊາຊີບນັກບັນຊີ ແລະ ນັກກວດສອບ ແລະ Mr. Ratna Neou, Country Manager, ACCA Laos and Cambodia; ໂດຍມີ Dr. ZAW WIN THEIN ນັກວິທະຍາກອນຈາກສະມາຄົມນັກບັນຊີລາຊະອານາຈັກອັງກິດ, ມີນັກສໍາມະນາກອນ, ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.

ຊຸດຝຶກອົບຮົມດັ່ງກ່າວໂດຍການຮ່ວມມືລະຫວ່າງສະພາວິຊາຊີບນັກບັນຊີ ແລະນັກກວດສອບ (LCPAA)  ແລະ ສະມາຄົມນັກບັນຊີລາຊະອານາຈັກອັງກິດ (ACCA) ທີ່ໄດ້ເຊັນບົດບັນທຶກຄວາມເຂົ້າໃຈຮ່ວມມືພັດທະນາ ຫຼັກສູດການບັນຊີໃນລະດັບສາກົນ ແລະ ຊຸດຝຶກອົບຮົມຄັ້ງນີ້, ຈັດຂຶ້ນພາຍໃຕ້ຫົວຂໍ້: ຄວາມຮູ້ກ່ຽວກັບມາດຕະຖານລາຍງານການເງິນສາກົນ (IFRS) ເຊິ່ງໄດ້ຈັດຂຶ້ນໃນລະຫວ່າງວັນທີ 02-04 ສິງຫາ 2023 ເປັນເວລາ 03 ວັນ, ເລີ່ມແຕ່ເວລາ 09:00- 16:00 ໂມງ, ໃນຮູບແບບເຊິ່ງໜ້າໂດຍຜູ້ເຂົ້າຮ່ວມທັງ ໝົດ 57 ທ່ານ, ເປັນຍິງ 34 ທ່ານ.  ໃນນັ້ນ,  ມີຜູ້ເຂົ້າຮ່ວມຈາກສະມາຊິກສະພາວິຊາຊີບນັກບັນຊີ ແລະ ນັກກວດສອບ, ຜູ້ປະກອບອາຊີບບັນຊີ ແລະ ກວດສອບ, ບຸກຄົນທົ່ວໄປທີ່ສົນໃຈ, ພ້ອມດ້ວຍແຂກຖືກເຊີນເຂົ້າຮ່ວມ. ​

ຈຸດປະສົງຂອງການຝຶກອົບຮົມຄັ້ງນີ້, ເພື່ອເປັນການສ້າງຄວາມຮູ້ຄວາມສາມາດທາງດ້ານວິຊາການກ່ຽວກັບການຈັດຕັ້ງປະຕິບັດລາຍງານມາດຕະຖານການລາຍງານການເງິນສາກົນໃຫ້ແກ່ສະມາຊິກ ແລະ ນັກຊ່ຽວຊານບັນຊີ. ທັງນີ້, ກໍ່ເພື່ອເປັນການສ້າງຄວາມເອກະພາບໃນຂົງເຂດຫົວໜ່ວຍທຸລະກິດ, ທັງເປັນການຊ່ວຍພັດທະນາສະພາວິຊາຊີບນັກບັນຊີ ແລະ ນັກກວດສອບ, ສະມາຊິກໃຫ້ເຊື່ອມໂຍງກັບພາກພື້ນ ແລະ ສາກົນ.

ສະມາຄົມນັກບັນຊີລາຊະອານາຈັກອັງກິດ (ACCA) ເປັນສະຫະພັນນັກບັນຊີເປັນອົງກອນລະດັບໂລກ ແລະ ໄດ້ຮັບມາດຕະຖາານລະດັບສາກົນ, ໂດຍມີນັກຮຽນ ແລະ ສະມາຊິກຫຼາຍຮ້ອຍປະເທດທົ່ວໂລກ, ເຊິ່ງການ ຮ່ວມມືລະຫວ່າງສະພາວິຊາຊີບນັກບັນຊີ ແລະ ນັກກວດສອບ ແລະ ສະມາຄົມນັກບັນຊີລາຊະອານາຈັກອັງກິດ  ເປັນການສືບຕໍ່ຮ່ວມມືເປັນຄູ່ຮ່ວມມືຍຸດທະສາດຊຶ່ງນັບແຕ່ 2016  ເປັນຕົ້ນມາ, ສ່ວນສະພາວິຊາຊີບນັກບັນຊີ ແລະ ນັກກວດສອບ (LCPAA) ໃນເມື່ອກ່ອນມີຊື່ວ່າອົງການຈັດຕັ້ງວິຊາຊີບນັກບັນຊີລາວ, ເຊິ່ງໄດ້ຖືກສ້າງຕັ້ງຂຶ້ນແຕ່ປີ 1998 ຕາມຂໍ້ຕົກລົງຂອງລັດຖະມົນຕີກະຊວງການເງິນ ສະບັບເລກທີ 0722/ກງ, ລົງວັນທີ 5 ພຶດສະພາ 1998, ໂດຍມີບົດບາດໃນການສ້າງທີ່ປຶກສາການບັນຊີ ແລະ ເຕົ້າໂຮມສະມາຊິກຂອງຕົນ, ຕໍ່ມາໄດ້ປ່ຽນຊື່ເປັນສະພາວິຊາຊີບນັກບັນຊີ ແລະ ນັກກວດສອບເພື່ອໃຫ້ສອດຄ່ອງກັບກົດໝາຍວ່າດ້ວຍການບັນຊີປີ 2013 ແລະ ກົດໝາຍກວດສອບອິດສະຫຼະປີ 2014.